राइनास नगरपालिका प्रोफाइल तथा विशेष आर्थिक क्षेत्र (SEZ) विकाश सम्वन्धि अभिमुखिकरण कार्यक्रम सम्पन्न

राइनास नगरपालिका, लमजुङको नगर प्रोफाइल तयार गर्ने शिलशिलामा नगरपालिकाको सातबिसे, बजार स्थित मिति २०७३-०२-०१, शनिवार अभिमुखिकरण तथा उक्त क्षेत्रमा कृषिमा आधारित विशेष आर्थिक क्षेत्र (SEZ) विकाशको सम्भावना सम्बन्धि अन्तरक्रिया कार्यक्रम सम्पन्न भयो | यसको साथै भूकम्प पछी ग्रामिण प्रविधिको भूकम्प प्रतिरोधी भवन निर्माण सम्बन्धि पनि प्रस्तुतीकरण भयो | नगरपालिका प्रशासन, स्थानिय अगुवाहरु तथा उक्त क्षेत्रबाट काठमाडौंमा बसोबास गर्ने नागरिकहरुको समन्वयमा सम्पन्न उक्त कार्यक्रमले नगरपालिकाको दीर्घकालिन चरणबद्ध बिकासमा सहयोग पुग्ने अपेक्षा गरिएको छ |

कार्यक्रममा नेपाल इन्जिनियर्स एशोसियसनका अध्यक्ष ई. ध्रुव राज थापाले राइनास क्षेत्रको सम्भावानाहरुका वारेमा धेरै सुने ता पनि प्रत्यक्ष भ्रमण गरि देखेपछी, यो क्षेत्र साच्चिकै विविध सम्भावनायुक्त ठाउं रहेको बताउंदै यस्ता क्षेत्रहरुको नीति निर्माण तहबाट विस्तृत पहिचान गरि चरणबद्ध रुपमा अगी बढ्नुपर्ने विचार राख्नु भयो | त्यस्तै उद्योग मन्त्रालय, विशेष आर्थिक क्षेत्र बिकास समितिका कार्यकारी निर्देशक ई. चण्डिका भट्टले विशेष आर्थिक क्षेत्र सम्बन्धि विविध विषयहरु स्पस्ट पार्दै नगरपालिका भित्र त्यस्तो क्षेत्र विकाशको लागि स्थल पहिचान गर्न र आफ्नो तर्फबाट सहयोग गर्ने धारणा राख्नु भयो | कार्यक्रममा नेपाल इन्जिनियरिंग परिषदका उपाध्यक्ष तथा नगर विकास कोषका कार्यकारी ई. बिनोद न्यौपानेले नगरको दीर्घकालीन विकासमा स्थानिय तहबाट शुरु गरिएको प्रयासको सराहाना गर्दै उपयुक्त कार्यक्रममा आफ्नो तर्फबाट सहयोग गर्ने वचन दिनुभयो | इन्जिनियिरङ अध्ययन संस्थान, पुल्चोक क्याम्पस, शहरी विकाश बिभागको संयोजक डा. सुधा श्रेष्ठले व्यवस्थित नगर प्रोफाइल बनाउन विध्यार्थीहरुको अधिकतम उपयोग गर्ने तथा स्थानीयहरूबाट पनि आवश्यक सहयोग हुनुपर्ने कुरा राख्नु भयो | त्यस्तै Habitech Building Technology का वरिष्ठ कन्सुल्टेन्ट ई. इश्वर जोशीले भूकम्पीय सुरक्षालाई मध्यनजर गरि ग्रामिण भेगमा उपयोगी भवन निर्माण प्रबिधिको वारेमा प्रस्तुतीकरण गर्नु भयो | कार्यक्रममा सहरी विकास तथा भवन निर्माण विभाग, डिभिजनल कार्यालय लमजुंगका डिभिजन प्रमुख ई. सचिन्द्र कुमार देव तथा जि.वि.स.-DRILP कार्यक्रमका जिल्ला आयोजना प्रमुख ई. मिस्टर अशोक ले पनि आफ्नो धारणा राख्नु भयो |

राइनास क्षेत्रको विविध श्रोत र सम्भावनाहरुको विश्लेषण गर्दै व्यवसायिक कृषि र कृषिजन्य उपजहरु लाई नै केन्द्रविन्दुमा राखी अगी बढ्नु उपयुक्त हुने कुरा धेरै विज्ञहरुले बताउनु भयो | यसअभिमुखीकरण / अन्तरक्रिया कार्यक्रम पश्चात इन्जिनियिरङ अध्ययन संस्थान, पुल्चोक क्याम्पस, शहरी विकाश बिभाग, स्नातकोत्तर कार्यक्रमका २० जना इन्जिनियर विध्यार्थीहरु राइनास नगरपालिकाको स्थलगत अध्ययनमा लागिसक्नु भएको छ | उहाँहरु हाल नगरपालिकाको सामाजिक, सांस्कृतिक, आर्थिक, वातावरणीय, पर्यटकिय, प्राकृतिक तथा मानवीय श्रोत साधनको संकलन गर्ने कार्यमा कार्यरत हुनुहुन्छ | 
अन्तरक्रिया संयोजन गर्ने स्थानिय वुद्धिजीबी स्वतन्त्र हमाल, नगरपालिका कार्यकारी अधिकृत नुर राज कडरिया, सर्वोदय सेवा आश्रमका संस्थापक कृष्ण राज ओलिया, स्थानिय महिला स्वयंसेवी नरमाया देवकोटा, स्थानिय धर्मेन्द्र कुमार गुरुङ. मात्रिका खनाल, शिव देवकोटा, शौभाग्यदय उच्च मा.वि. का प्राचार्य सहित धेरै व्यक्तिहरुले कार्यक्रमलाई सफल बनाउन विशेष पहल गर्नुभयो 
यस कार्यक्रमलाई समग्र रुपमा व्यवस्थापन गर्ने राइनास नगरपालिका तथा सहयोगी सरकारी निकाय तथा विभिन्न संस्थाहरु संघिय मामिला तथा स्थानिय बिकास मन्त्रालय, शहरी बिकास मन्त्रालय, उद्योग मन्त्रालय - विशेष आर्थिक क्षेत्र (SEZ) विकास समिति, इन्जिनियिरङ अध्ययन संस्थान, पुल्चोक क्याम्पस, नेपाल इन्जिनियर्स एशोसियसन, नेपाल शहरी तथा क्षेत्रीय योजनाकार समाज साथै The University of New South Wales, Australia लाई धेरै धेरै धन्यवाद |