प्रिय कविको छन्द लहरी

 राष्ट्र कवि माधव प्रसाद घिमिरे प्रति समर्पित

कविवरको देहावसान  : २०७७|०५|०२, मंगलवार  (उमेर : १०१ वर्ष)

----*----*-----*-----*-----*-----*-------*-----*------*------*------*----

१)

प्रचण्ड उष्ण,
छंगछंग निर्झरीको समिप, आद्र वायु,
जब हुन्छ शरीर सेचन,
हुन्छ शितल, प्रफुल्ल तनमन,
अहा !
त्यो भन्दा प्रफुल्लित, शितल
प्रिय कविको छन्द लहरी |

 २)

उकुसमुकुस ग्रीष्म,
वरपिपल चौतारी, शान्त बतास,
जब गर्छ सु-कोमल चुम्बन,
हुन्छ आनन्द, शान्त तनमन,
अहा !
त्यो भन्दा आनन्दित, शान्त,
प्रिय कविको छन्द लहरी ||

३)

शैशव वसन्त,
कोमल पालुवाका मधुर धुन,
जब ठोक्किन्छ कर्णपत्रहरुमा,
भर्छ मधुर मादकता मस्तिष्कमा,
अहा !
त्यो भन्दा माधुर्य, मादक,
प्रिय कविको छन्द लहरी |||

४)
उन्मात्त शरद,
फक्रिएको वातावरण, गोधुली साँझ
जब भर्छ रस कण कणमा,
बन्छ हृदय रसिलो,
अहा !
त्यो भन्दा रसिलो, कोमल
प्रिय कविको छन्द लहरी|||
-*-----*-----*-----*-----*-

- दिनेश चन्द्र पन्थी ‘दीप’

२०७७ भाद्र २, रोज ३ |
********************************