म आएँ, ए सोलु, म आएँ |

 १)

तिमीलाई भेट्न,

अनेक उमङ्गका बहार लिएर,

हजारौं भावनाहरुमा छचल्किएर,

दिनको प्रकाश र रातको जुनसंगै पौडिएर,

मन मस्तिस्कमा तिमीलाई नै सजाउंदै,

पानीमा बाफ झैँ एकाकार हुन,

म आएँ, ए सोलु, म आएँ |

२)

तिम्रो सफेद रुपको साक्षात्कार गर्न,

अनेक बाधा अड्चन सहेर,

न प्यासमा भुलेर, न राषमा भुलेर,

मुटुको कण कणमा तिमीलाई नै सजाउंदै,

शरदको बिहानीमा,

कोमल भानुको लालित्यसंगै तिमिसंग लहसिन,

म आएँ, ए सोलु, म आएँ || 

3)

तिमिसंग प्रेमिल मिलनको आशा रोपेर,

हरक्षण सुनौला बिहानी भर्ने तिम्रो गुणगान सुनेर,

उर्लंदो खहरेहरु छिचोलेर, नागबेली पहाडहरु चढेर,

शितमा नुहाएर, जुनमा ओभाएर,

अञ्जुली भरि सुनकोशीको तरङ्ग उबाएर,

तिम्रो निष्कपट मायाको संसारमा हराउन,

म आएँ, ए सोलु, म आएँ |||

४)

हेर त ! तिम्रो अगाडी एक प्यासी,

खुशीका हजारौं शृंखलाहरु साँट्न,

मनका वहहरु पोख्न र इन्द्रेणी सपनाहरु सजाउन,

असंख्य पनहरुको असंख्य मनहरुको दुत बनेर,

न रागमा भुलेर, न द्वेषमा डुबेर,

तिम्रा सयौं अमृतकुण्डहरुमा डुबुल्की मार्न,

म आएँ, ए सोलु, म आएँ ||||

५)

एक यात्री बनेर, स्वप्निल रात्रीहरु बिताएर,

खर्कहरुमा चौंरीका वगालहरुसंगै जिस्कदैं,

तिम्रो स्वर्णिम शिर सगरमाथा चुम्न,

तिम्रो छातीमा हाँसेका गुँरासहरुसंगै रङ्ग भर्न,

तिम्रा असंख्य हिउँचरी र डाँफेहरुसंगै नाच्न,

मध्य शरदको सुन्दर बिहानीमा,

म आएँ, ए सोलु, म आएँ |||||

६)

तिम्रो घुम्टो आज कसिलो देख्दै छु,

कि लजायौ या, रिसायौ ?

आफ्नै बलेनीमा हुर्किएको एक प्रेमीको,

थकित पर्खाइमा या त दुख बिसायौ ?

रंगिन कृतिम संसारको रमझम,

तर नितान्त एक्लो परिवेशमा

तिम्रो याद हुरी बनेर आयो, र त म आएँ, 

संसार छाडेर तिमिसंगै हराउन म आएँ,

ए सोलु, उघार प्रेमको घुम्टो,

म आएँ, म आएँ, म आएँ ||||||

-  दिनेश चन्द्र पन्थी “दीप”

(२०७७-०७-१२, बुधवार)

(नोट : नेपालको पूर्वी पहाडमा रहेको, प्राकृतिक सुन्दरताले भरिएको, सर्वोच्च शिखर सगरमाथा सहित असंख्य हिमशैलहरु शिरमा बोकेको भु-स्वर्ग सोलुखुम्बुको प्रथम भ्रमण, नेपाल टेलिकम, सोलु-सल्लेरी कार्यालय निरिक्षण गर्ने क्रममा आश्विन-१९, २०७७ सोमवारका दिन गर्ने सौभाग्य मिलेको थियो |)  

--------------------**------------------------**-------------------------