राइनास उपत्यका

अग्ला अग्ला दुईटा कोट ऐतिहासिक ठाउँ

सुन्दैमा नै ढक्क फुल्ने राईनास-लिगलिग नाउँ |

दुई कोटको बलेनीमा अहा ! कस्तो फाँट

कृषि विकाश गर्न पाए अर्कै हुन्थ्यो ठाँट ||

चम्पावती सललल कति राम्रो दुन

केहि कुरामा कमि छैन कमि बरु सुन |

चारतिरै डाँडाकाँडा आकाश मै छुने

बिचमा बसि नजर लाउँदा मनै शितल हुने ||

चम्पावती दुवैतिर मनमोहक तट

बालपन जस्तै लाग्ने प्रकृतिको छटा |

छङछङ गर्दै तटमा झर्ने हेर कति रोशी

केहि नबुझि जीवन जिउने हामी कति बासी ||

सिरानचोक, दुधपोखरी सबै तपोभूमि

देवगण नै बस्थे होला सारा घुमी घुमी |

सन्ततिलाई जोगाइ राख्ने हाम्रा पिता पुर्खा

केहि नगरी सुति खाने हामी कति मुर्ख ||

भलायखर्क, चक्रतीर्थ, थालाजुंङ र हर्मी

धमिलिकुवा, तार्कुघाट र आँपपिपल सब पर्नी |

विचमा बग्ने कन्चन चेपे दायाँबायाँ फाँट

यै फाँटलाई विकाश गर्ने हामी सबको आँट ||

कोल्की, प्यार्जुंङ, भारते र मोहोरियाकोट

यी गाउँलाई छोड्न हुन्न छोडे लाग्छ चोट |

गौंडा, विचौर, इलम र दुधपोखरी शिरमा

हाम्ले केहि नगर्नाले कति होलान् पिरमा ||

पाचोक माथि ढोडेनी र फलेनीका भिर

यी भिरमा जीवन जिउँदा कति कष्ट पिर |

एउटा घर वल्लो डिलमा अर्को घर पल्लो

छुट्टाछुट्टै बस्नुपर्दा कति मन खल्लो ||

छरिएका सारा वस्ती एकै गर्ने मौका

विकाश गर्नुपर्छ अब राईनास उपत्यका |

एकीकृत वस्ती विकास गर्ने आयो बेला

यति राम्रो उपत्यका अन्त कता होला ||

गाउँ छोडेर शहर बजार वस्ने दाजुभाई

यो ठाउँको सम्भावना कसले बुझ्ने खोई ? |

स्वदेश विदेश घुम्दा पनि यति सुन्दर गाउँ

भेटिएन प्रकृतिले बनाएको ठाउँ ||

विदेश जाँदा दुख पिडा देशकै माया गाढा

यै ठाउँको विकाश भए किन बस्थे टाढा ?

कृषिसहर विकाश गर्न अब हाम्रो ध्यान

जुट्नुपर्छ यो कुरामा सबै जन मन ||

बहुजाती, बहुभाषी चम्पा वारी पारी

कल्पनाको तरेलीमा सुन्दर फुलबारी |

माथी माथी हरित नगर तल कृषि घर 

कति मोहक हुन्थ्यो होला त्यतिबेला सहर ||

दुई कोटको बलेनीमा अहा ! कस्तो फाँट

कृषि विकाश गर्न पाए अर्कै हुन्थ्यो ठाँट ||

        -  ई. दिनेश चन्द्र पन्थी “दीप”

          भलायखर्क-१, लमजुङ,   २०७२-०५-२३, बुधवार